Albisteak

ENBA nekazal sindikatuak, BASERRITARRON LAGUNA sariaren hirugarren edizioan SUSTRAIA telebista saioa sarituko du bere 28 urtetako ibilbide luze eta oparoan (lehen emisioa 1989ko apirilaren 8an izan zelarik) baserria eta baserritarren bozgorailua ezinhobea izan delako, baserriko errealitate aldakorraren berri emanaz eta hiritargoan landagunekiko sentiberatasuna lantzeko tresna aproposa izanik.

Telebista saioa, bere estilo lasai eta patxadatsuarekin, izaera dibulgatiboarekin, bidelagun ezinhobea izan dugu lehen sektorearen irudia euskal gizarte osoarengana helarazteko garaian.

Saria Urtarrilaren azken igandean, urtarrilaren 28an, Urnietako Salesiarren Ikastetxean ospatuko dugun ENBAren Batzar Orokorrean banatuko dugu.

Ostiralean, urtarrilak 12, Hernanin Orona Fundazioak duen auditorioan "2020tik aurrerako NPBren erreformaren klabeak" izeneko ihardunaldia ospatu zen, bai jende aldetik, 150 lagunen bat, bai hizlarien maila gorena kontuan izanik, zeharo arrakastatsua izan zela esan dezakegularik.

Ihardunaldiaren irekiera, Gipuzkoako ENBAko presidentea den Iñaki Goenagaren eskutik egin zen eta bere atzetik, Eusko Jaurlaritzako nekazaritzako sailburuordea den Bitto Oroz jardun zen Europako Batzordearen komunikazioaren aurrean Jaurlaritzako posizionamendu ofiziala azalduaz. Orozen esanetan, NPBren ibilbide berrian, Europako eskualdek protagonismo haundia behar lukete izan eta honenbestez, aipatzen diren NPBko plan estrategikoak egiteko eta defendatzeko ahalmena aldarrikatu zuen. Halaber, egungo legedian oinarrituta, NPB berrian estatu mailan subsidiaritatean sakontzea eskatu zuen, beti ete, nahi eta eskumena duenen artean.

Saliburuordearen ondoren, Europako nekazal politikan aditua den Tomás García Azcárate CSICeko ikerlaria aritu zen, bere hitz jario eta modu errazean, gaur egun Europak bizi duen duda-muda eta zalantza egoeraren berri emanaz, NPB berria onartu behar duenean nahiz ekonomia nahiz politika alorretik hain hodei beltzak ditugunean.

Kafea hartu ahala, Europako legebiltzarreko 4 ordezkariekin oso mahainguru dinamiko eta interesgarria ospatu zen, Euromontanako presidentea den Juanan Gutierrezen gidaritzapean. Izaskun Bilbao jeltzaleak, Europa mailan gobernantza eredu berria aldarrikatu zuen non estatu gabeko herrientzat subsidiaritatea sustatzen den. PP alderdiko Esther Herranzek zalantzan jarri zuen erreformaren beharra bere ustean ez baitago ez denbora lan txukuna egiteko eta onartu berri den Omnibusa aplikatzen hasi gabe dagoelako. EHBilduko Josu Juaristi bestalde, nekazaritzako ereduaz jardun zen eta erabakitzeko unean, estatu pare jarriko gaituen independentzia proposatu. Azkenik, PODEMOSeko Estefania Torresek, europatik sustatu beharreko nekazaritza eredua klima aldaketaren aurkako borrokarekin lerrokatu beharko luke.

Ondoren, Euskadiko nekazal azpi sektoretako 4 ordezkari izan genituen: Inma Iriondo, artzaina eta gazta-esnekigilea; Pablo Durana, zerealista eta Euskadiko Nekazal kooperatibetako presidentea, kooperatiben betebeharra azpimrarratuz; Mikel Txueka, txakolingilea eta Txomin Etxaniz bezalako upategietan ematen ari den belaunaldi aldaketako eredua eta Mikel Arteaga, esne ekoizleak, gero eta merkatu zabalagoan kooperatibek bete beharko luketen papera aldarrikatuz.

Ihardunaldi ixteko, Gipuzkoako foru diputatua den Ainhoa Aizpuru izan genuen, baserritarren sektorearentzat babes mezu garbia azalduz eta eguna borobiltzeko, Diametro 200 jatetxekoek zerbitzatutako luntxaz gozatu genuen, Fundazioko atarian bertan.

Ihardunaldiak LABORAL KUTXA, Mercedes-Benz eta Eusko Jaurlaritza - HAZIren babesa jaso du.

Gipuzkoako Foru Aldundiak Lurralde Historikoan sagardorako sagarrondoak landatu, hobetu eta garatzeko diru laguntzen 2018ko deialdia onartu eta argitaratu berri du. Deialdiak 290.000 eurotako aurrekontua du eta eskabideak aurkezteko epea Otsailaren 20 da eta lagundutako inbertsioak egiteko epea 2019ko maiatzean amaitzen da.

2018ko Deialdia / Deialdi honetako diru laguntzak honako araudian jasotako baldintzak bete beharko dituzte (2016ko ekainaren 28ko Gipuzkoako ALDIZKARI OFIZIALA, 122 zk.).

Kalean da ENBA zldizkariaren 209. zenbakia, hain zuzen ere, neguko alea. Bertan irakurtzeko moduan dituzu 2020tik aurrerako NPBri buruzko Ihardunaldiaren xehetasunak, indarrean jarri berri den Omnibus Erreglamenduaren informazio zabala, Xylella fastidiosari buruzko artikulu bikaina, Asteasuko GOINE gaztandegiari buruzko erreportaia, Autonomoen Lege berriari buruzko informazioa eta ohiko atalez gain, nahiz Bizkaia nahiz Gipuzkoako orrialdeak.

Aldizkari osoa ikusteko, egin klik HEMEN.